維拉趁火打劫

猪拉多纳

奇勒續約扭計西布朗爆內憂

英超獨腳戲上演西米德蘭打吡（West Minlands Derby），西布朗主場迎擊阿士東維拉，主隊上輪聯賽尾段被屈十二碼失分打窒道氣，賽前傳來教頭奇勒吊高嚟賣唔傾續約問題住，內部氣氛麻麻。維拉今季客強主弱，唔怕客場打硬仗，博讓球客勝！

（now 621周二凌晨4時直播）

西布朗教頭奇勒上場領軍作客史丹福橋倒戈鬥舊主車路士及舊拍檔莫連奴，若非球證尾段誤判十二碼已經贏埋，佢哋今季專打老虎，之前挑戰阿仙奴同曼聯等勁旅都唔使輸，奇勒個招牌省到立立令。呢個有料教頭去到季尾就完約，會方近日高調表示將展開續約談判，但奇勒話唔急住傾，似乎想跳草裙舞噃。咁諗都正路嘅，既可爭取較佳待遇，又可睇埋有乜筍工，但對球會嚟講唔係好事，有乜風吹草動易亂軍心。
維拉客戰更醒神

另一邊廂，阿士東維拉傷兵問題仍然嚴重，王牌進攻鐵三角賓迪基、艾邦拉荷同安祖斯韋文全部有傷，預期賓迪基可以紮住上，而中場尼索比亞同守將奧哥尼等都唔踢得，但佢哋都非核心球員，唔會嚴重削弱球隊戰鬥力。

經過一段磨合期後，維拉班新兵陸續交到貨，守將巴根拿同射手高薩克上場都有士哥，查實去到打吡決戰，無論出乜人都要打真軍o架 喇，呢班新兵正好需要一個舞台證明自己，肯定分外搏命。

維拉今季客場發揮好穩定，聯賽作客五戰試過砌低阿仙奴，只係輸過畀惡爺車路士，佢哋上季兩戰西布朗都打成平手，兩班波級數同戰鬥力接近，預期維拉可保不敗。