西布朗 維拉射手「大」鬥法

猪拉多纳

英超周一獨腳戲有場西米德蘭打吡上演，由阿士東維拉出訪山渣球場硬撼西布朗。兩班波目前同得14分並列中游，今仗贏波一方可以乘勇挑戰歐洲賽席位，輸波嗰邊隨時要為護級煩惱。大家都以3分為目標肯定唔會打守勢波，仲要撞正齊齊有星級射手復出，睇怕會係場入球騷，1.92倍入球大要捧！

（now621台周二凌晨4:00直播）

今季英超踢得異常緊湊，積分拉得緊，喺今輪之前，西布朗以11戰得14分排第11，同分嘅維拉就因得分球較差排12位，唔係誇張，今仗贏波嗰隊有17分喺手，要追上前列球隊爭逐歐洲賽席位絕對有機會。至於輸波一方則要擔心被護級分子追上，呢3分根本唔跌得。
安歷卡 賓迪基齊復出

大戰當前，兩班波狀態都嚟得唔錯，西布朗近9戰僅逢1敗，上輪對車路士若非臨完場前畀球證屈個12碼，要贏埋車路士都得。至於維拉近5戰雖然只得1勝，但其實有3場都可以做到冇失波，上輪砌低卡迪夫城重返勝軌，球員都充滿信心迎接今場打吡。

由於之前係國際賽期，雙方傷兵都好得七七八八，西布朗除咗有中場布拉特、守將麥奧尼同門將邁希爾及時傷愈外，更重要係法國老牌射手安歷卡都可以候命，有佢喺前線操控住個進攻節奏同發揮牽制力，配合狀態唔曳嘅沙恩朗，球隊要搵到入波唔難。至於維拉呢邊，一對快翼安祖斯韋文同艾邦拉荷都傷勢無礙，最緊要係連比利時射手賓迪基都好番晒，維拉前線有佢拍住長人高薩克，火力唔可以睇小。

翻查往績，維拉近5次出訪山渣球場，就有4次開出入球大，始終大家係同區宿敵，每次碰頭都唔會留手，今晚梗有入球騷睇啦！