巴塞馬體會夠分唔使搏命

猪拉多纳

阿積士膽大 同巴塞鬥攻

荷蘭班霸阿積士喺歐聯Ｈ組暫時得四分排喺第三，落後次席嘅AC米蘭一分，出線形勢可謂十分危急，今仗主場對住巴塞隆拿一定要贏波先至可以保持出線機會，球隊毫無疑問會大踢進攻足球，務求全取三分，戰意絕對鮮明。
美斯缺陣無損進攻質素

巴塞隆拿雖然已經夠分出線，加上今場有球王美斯繼續養傷，但隊中仲有尼馬、法比加斯、柏度洛迪古斯呢班入球好手，攻力絕對唔成問題，睇番巴塞近三場每場都入三球或以上，就知呢隊波要入波絕對冇難度，預料今仗雙方會鬥攻，大盤值捧。

（有線63台周三凌晨3時45分直播）
馬體會寒戰 辛尼特搶分

今季強勢彈起嘅馬體會就要遠征俄羅斯鬥辛尼特，馬體會喺歐聯Ｇ組四戰全勝，肯定首名出線，今仗未必搏命踢。而且馬體會嘅情況同巴塞有啲不同，今場要長途跋涉飛去俄羅斯，舟車勞頓加上當地攝氏零度下嚴寒天氣，稍一不慎球員隨時會受傷離場，所以為穩陣起見，主帥施蒙尼會留力出副選，據報大半隊主力包括迪亞高哥斯達、韋拿、高甸、阿達杜倫、堤亞高文迪斯都唔會隨隊。
贏唔到隨時畀波圖爬頭

主隊辛尼特喺呢組以五分排第二，但緊隨嘅波圖只比佢哋少一分，呢個次名出線資格可謂寸土必爭，所以辛尼特今仗為出線不容有失，難得對住戰意鬆懈嘅馬體會，捧上盤啱數。

（有線61及201台周三凌晨1時直播）