巴塞超班吼半場W

猪拉多纳

發電機沙維復出鬥阿積士

只要攞多1分就可以鎖定歐聯H組首名嘅巴塞隆拿，今晚作客荷甲班霸阿積士，肯定想速戰速決早入波，為自己攞番粒定心丸。雖然話佢哋今仗會續有球王美斯養傷，但進攻發電機沙維復出，火力依然有保證，呢場波對住焗攻搶分爭出線嘅主隊，要半場領先話咁易，1.85倍「半場客W」抵玩！

（有線63周三凌晨3:45直播）
馬天奴輕鬆 賽前舉家旅行

目前H組形勢，巴塞4戰10分拋甩次席AC米蘭同季席阿積士5分同6分，已經提早出線，不過為咗等淘汰賽階段條路好走啲，確保首名自然重要，今仗點都唔會Hea踢。冇錯，「地上最強」傷兵唔少，除咗美斯外，就連丹尼爾、艾迪安奴同基斯甸泰路都齊齊加入十字軍，據聞今晚就連隊長佩奧爾都要串演右閘，不過點都好，中前場有沙維復出撐住，又有法比加斯同恩尼斯達孭飛，實力超班嘅佢哋真係無乜好驚？

淨係睇吓佢哋個主帥馬天奴，前日仲有閒情帶埋老婆同囡囡去西班牙聖山蒙塞拉特山玩番日，就知佢哋對今仗幾有信心。事實上，巴塞喺呢位阿根廷名帥帶領下，開季至今保持住20場不敗佳績，勝率高達8成，狀態根本Fit到漏油。至於賽前荷蘭球王告魯夫雖然批死巴塞冇咗美斯會跌Watt，但力奇認為佢根本忽略咗巴西超新星尼馬嘅冒升，要砌低阿積士肯定綽綽有餘啦！
阿姆斯特丹歡迎多過敵對

阿積士呢邊，所在地嘅阿姆斯特丹市幾乎全城都為巴塞到訪做足歡迎準備，街頭巷尾舖頭都有巴塞產品賣，敵對氣氛冇乜，唔知會唔會影響球隊戰意？當然，阿積士為咗搶分爭出線，今鋪都唔可以死守，衰在佢哋嘅首次席射手史基賀臣同施安迪莊都有傷在身，今仗或會齊齊缺陣。咪話力奇潑佢哋冷水，阿積士已連續9次對西班牙球隊全敗，再睇埋巴塞近期嘅6連勝，有5場都係半場已經贏出，今晚要開出「半場客勝」應該冇難度。
Data King 阿積士患恐「西」症

‧巴塞喺分組賽傳球成功率87%，冠絕今屆歐聯。

‧阿積士近9次對戰西班牙球隊全敗。

‧巴塞新帥馬天奴領軍20戰得16勝4和。