兵臨城下捧客W

猪拉多纳

阿仙奴帶齊重炮遠征威爾斯

「兵工廠」阿仙奴今晚遠征威爾斯首邑加的夫，將出動多支大炮，力圖以重火力轟散「火龍」卡迪夫城。英超榜首阿仙奴今季表現穩定，最煞食係一眾主力狀態持續托弗，而且中前場個個都有入球能力，今仗帶足彈藥「兵」臨「城」下，到訪卡迪夫城球場袋走3分冇問題，一於直取客W！

（now 621周六晚11時直播）
黃金中場個個弗爆

「兵工廠」今季成功鑄造出一條黃金中場，買入「助攻王」奧斯爾同鐵血防中法米尼，再加上舊有班底如阿迪達、禾確特、韋舒亞、辛迪卡索拉、路斯基等，中場勁有深度，同埋今季球隊傷病情況比起上幾季冇咁嚴重，故上兩場對修咸頓同馬賽阿仙奴有足夠兵源進行輪換，今場體力不成問題。

今季阿仙奴呢條黃金中場輪流發威，先有德國貴價新核奧斯爾既助攻又入波，成功激活咗球隊嘅進攻組織，後有「藍神」艾朗藍斯成功彈起，經常射入靚波，佢今場倒戈母會更要展示實力，而青訓產品韋舒亞亦不讓呢兩位中場專美，上場歐聯對馬賽梅開二度，開波僅29秒就以「亨利式」士哥先拔頭籌，加上翼鋒禾確特已經傷愈復出，中場人腳鼎盛，雲格可謂遇上「幸福的煩惱」，再加上球隊重要嘅取分之匙基奧特又係弗到漏油，上仗對修咸頓轟入兩粒成英雄，卡迪夫城真係唔知防得邊個至好﹗
卡迪夫城好難偷雞

卡迪夫城今季主場雖然唔弱，贏過曼城，又和到愛華頓同曼聯，睇落似係強隊殺手，但其實贏到曼城皆因對方後防脆弱，門將赫特又發波瘟犯下戇居失誤，至於和曼聯嗰場若非朗尼喺補時階段「單刀橫傳」錯失良機，「火龍」邊可能攞到嗰1分，今場對住火力強勁、後防又唔差嘅兵工廠勢難再偷雞，客勝捧得過。

馬基麥基(卡迪夫城)：艾朗藍斯係歐洲最佳年輕球員之一，我哋要小心，但並冇特別措施去防守佢，因為阿仙奴陣中仲有好多有才華嘅球員。

雲格(阿仙奴)：球隊冇再出現新嘅傷兵，個個都可以隨時候命，倒戈嘅藍斯今季進步神速，希望佢可以幫助到球隊繼續留喺榜首位置。