皇馬「-2」照炒華拉度拉

猪拉多纳

粒粒皆星C朗續抖未驚過

今晚西甲「銀河艦隊」皇家馬德里再度登場，會喺巴拿貝主場撲擊華拉度列。皇馬暫時落後榜首嘅巴塞隆拿6分，已經再冇失分空間，呢3分志在必得。皇馬一眾球星狀態甚佳，就算王牌C朗繼續休戰，但有艾斯高、加里夫巴利同埋賓施馬呢個周中歐聯大捷嘅三叉戟孭飛，今仗隨時又大炒一場，讓球主客和開「-2」照撐1.82倍「讓主」！

（now632台周日凌晨3:00直播）
同皮里茲決裂　拉莫斯騷Quali

如果話莫連奴以防守理念帶領「銀河艦隊」，現任教練安察洛堤相信係以攻代守。經過季初一段磨合期，「肥安」經已釋放皇馬最大嘅攻擊力，近4場西甲攻入20球，絕對稱得上係恐怖！最緊要係，就算佢哋周中對住加拉塔沙雷，冇咗C朗拿度都好，其他球員都孭得到入波重任，省夠4粒。始終佢哋陣內都有好多可獨當一面球星，諸如迪馬利亞同莫迪歷又可以提供無限輸送，相信佢哋今晚一定會夾埋做齣好戲，等C朗放心抖。

防線方面，副隊長沙治奧拉莫斯近日突然傳出佢同會長皮里茲不和，後者話明只要收到6,500萬歐元開價，就算係宿敵巴塞隆拿都照放拉莫斯走。正所謂此處不留人，自有留人處，今晚正好係拉莫斯「騷哥利」時間，對手睇怕都幾難入到波。
華拉度列近10戰僅1勝

華拉度列暫時位列尾4，近10場只係贏得嗰1場，狀態真係差到冇朋友，雖然對住同級球隊防守力尚算可以，不過對住喺西甲實力超群嘅巴塞同皇馬就唔同講法，早前作客「地上最強」以1:4敗走，今晚對住着晒火嘅皇馬，相信都難逃被炒嘅命運，問題只係畀人炒幾多球啫！