橫濱全城撐水手「新」王登基

猪拉多纳

往績佔上風，傷兵好番晒，又得到全巿支持，只差3分就攞到日職冠軍嘅橫濱水手，今日响日產球場迎戰來訪嘅新潟天鵝，個1.48倍主勝十拿九穩。

（有線61及201周六下午1:00直播）

由賽前消息去睇，水手的確有明顯優勢。首先，佢哋嘅傷兵齋藤學、栗原武藏都好番晒，已經隨隊操練咗幾日。由於攞埋呢3分，水手就會繼04年後，再一次登上冠軍寶座，呢場波啲飛去得好勁，前日已經賣出56,000幾張，估計今日實會坐爆，話唔定仲打爆64,000人嘅舊紀錄添。事實家陣成個橫濱巿都撐緊水手，山下公園側邊個海洋塔，由尋日開始連續兩晚5點到10點，都發放紅、藍、白3種燈光，用水手嘅「三原色」嚟表達支持。
「日產福地」鬥新潟勝率達80%

陷入全城狂熱嘅水手，其實仲有另一個優勢－往績。如果盃賽加聯賽，無疑佢哋只得10勝5和8負，好似冇乜着數，不過齋計响日產球場聯賽出戰天鵝，佢哋就取得4勝1和，勝率高達8成。

坦白講，排第8嘅天鵝已經等緊收咧，話就話佢哋贏到水手嘅話，就可以創造球隊今季最長嘅４連勝紀錄，但係論推動力又點及得上水手嘅捧盃欲望吖？唔使諗咁多，博水手開W提前一輪封王啦！