轉跑泥地有力「得米」

猪拉多纳

　　今次賽事跑四草七泥，查閱各倉季內泥地成績，以方嘉柏獲三贏一位最標青；但另一方面，文家良的泥地表現同樣出色，雖然只獲兩冠兩亞四季，於泥地賽成績榜位列第三，惟馬匹上名率高達五成七，計落即每派兵兩次便有一次上名，搏殺準得交關！以文廐泥地參賽馬作為扶手棍，無疑予人安心感覺，值得跟進。

　　第三場四班泥地1200米，「永得米」上仗久休復出，處女馬竟熱至5.9倍，真不知幕後信心何來。事實上，此駒去季兩戰皆無建樹，莫非唞暑期間大幅進步，惹來春江鴨先「賭」為快？睇睇「永得米」於10月兩試泥閘俱入三甲，走勢確是不差，難怪上仗引來票數支持。谷草搏失後，今仗馬兒轉戰其盲門泥地賽，觀乎牠的試閘姿態，腳法必較草地合適，經剛戰退熱一回，小心今次見真章！

　　至於第十一場的「風雲」，上仗於泥地從容大勝對手三乘許，原來其一哩性能更勝短途。今仗棄贏馬功臣何澤堯，動態古靈精怪，或會令人起戒心，但回顧往績，此駒過往四配柏寶兩度入位，人馬誠是舊相好。難得馬兒搵到最佳出路，今將矛頭指向勝程，擺明車馬搏得就搏，強配柏寶乃務求穩陣，更值得信賴。(賭博士)