意甲王者祖記莫屬

猪拉多纳

歐洲球季啱啱過咗四個月、踢咗大約三分之一嘅賽事，記得Peter舊年好早已經預測曼聯同拜仁可以贏到聯賽冠軍。不過，Peter貫徹「睇準先講，唔知就唔講」嘅宗旨，所以到今日先對幾個聯賽作出展望。今季英超顯得非常唔明朗，暫時只得阿仙奴嘅表現較突出，現階段難以預測邊隊可以「笑到最後」。

Peter對德甲頗有信心，拜仁可以話係十拿九穩可以贏到聯賽冠軍。哥迪奧拿入主拜仁後已逐漸適應球隊嘅環境，加上拜仁實力喺德甲確實係超晒班，所以Peter好有信心拜仁可以成功衞冕。Peter成個11月都有評述意甲賽事，雖然祖雲達斯現時只領先羅馬1分，但球隊陣容強勁，除門將保方、中場派路、前鋒泰維斯及洛蘭迪外，尚有年輕的法國全能中場保羅普巴，整體實力明顯遠勝其他意甲隊伍。

祖雲達斯奪標前景雖然冇拜仁咁十拿九穩，不過Peter相信佢哋九成可以贏得意甲冠軍。以上所講嘅全部都係有話直說，球迷們信唔信就由你哋自己判斷喇！