祖記開行火炒烏甸

猪拉多纳

今晚意甲有祖雲達斯主場迎戰烏甸尼斯，「斑馬兵團」近期無論喺聯賽定歐聯嘅表現都非常勇銳，全賴「狂牛射手」洛蘭迪復甦，加埋泰維斯同維達爾都弗到漏，今晚鬥作客唔掂嘅烏甸尼斯，大炒一場冇難度，一於捧1.7倍「讓主」啦！

（TVB 301周一凌晨1:30直播）
洛蘭迪重拾射門鞋

泰維斯同洛蘭迪今季初齊齊加盟祖雲達斯後，明顯係「泰仔」嘅狀態好得多，相反，上季畀畢爾包雪藏嘅洛蘭迪出場機會唔多，惟有繼續做「雪人」。好彩，可能因為世界盃逼近，呢位「巨塔」終於及時解凍重振昔日雄風，近4場更攻入3球之多，同「泰仔」拍住上肯定無堅不催，加埋無論踢中場定中堅都得心應手、上仗歐聯大演帽子戲法嘅維達爾，要幫祖雲達斯延續聯賽5連勝嘅強勢兼炒起烏甸，Easy Job啦！

反觀烏甸尼斯今季喺意甲嘅作客戰績非常差劣，6場輸足5次，最近8場聯賽近有5仗食白果，就算迪拿達利傷愈復出，都難望呢位老將靠一己之力救晒成隊，對住力爭衞冕嘅祖記好難唔輸鑊甘喇。