「升格男」坐鎮京都睇高一線

猪拉多纳

今日可以話係日乙嘅附加賽日，因為有3場升班附加賽準決賽同一場護級附加賽，當中京都不死鳥對長崎成功丸，1.8倍主W可以睇高一線，事關佢哋有件「升格男」幫手。

（開賽時間：周日下午1:00）

上季都踢過升班附嘅京都，就最清楚呢啲等同盃賽嘅波點踢，原因係佢哋衰過。舊年佢哋响呢個升班附嘅準決賽階段，輸咗畀排第6嘅大分三神，結果決賽都入唔到，個教訓好大。今季京都捲土重來，就有件大分三神舊將三平和司幫手，呢個前鋒今日會改踢右中場，希望提升京都嘅攻擊力，雖然有條升班命，佢就謙稱自己冇乜秘密招數，但係就決心要做「2年連續升格（升班）男」。
長崎今季對賽輸晒

查實京都唔單只大賽經驗比較豐富，最重要係長崎今季升上日乙之後，畀佢哋連o趙兩場，仲要一球波都入唔到，往績絕對係京都贏晒。

當然，長崎都唔係冇條件攪亂檔，主帥高木琢也仲懶神秘話度好晒橋添。不過長崎有岡本拓也坐波監，反而對手嘅傷兵安藤淳、酒井隆介幾件都陸續傷愈，而且論經驗長崎始終蝕底，加埋有個往績輸晒嘅包袱，樣樣綁手綁腳，好易畀京都嘅強攻打瓜。