錘仔扑水晶 「大」有睇頭

猪拉多纳

「孖Cole」翻生火併進攻足球

人會變嘅，以前史篤城啲波幾鬼醃悶呀，但你以為佩尼斯會一成不變咩？又唔係喎！呢位光頭佬接掌水晶宮之後一改保守作風，今晚首度喺史靴斯公園出擊，肯定想用3分獻畀Fans做見面禮，撞啱韋斯咸有「孖Cole」翻生，呢場「倫敦打吡」梗係要捧2.1倍「大」啦！

（now621台周三凌晨4:00直播）
水晶宮新帥搶攻護級

佩尼斯昔日執教史篤城嗰陣，唔係玩鐵桶陣就係高Q大棍，想瞓覺好嘅話睇佢帶嘅波就真係啱晒。之但係家陣喺英超包艇嘅水晶宮水深火熱，佩尼斯都知再冇本錢打守勢波，所以接掌水晶宮後第一場波就「洗心革面」，學人打進攻足球。

有睇上星期六水晶宮輸畀諾域治0:1場波嘅朋友，都知水晶宮查實唔係冇攻勢，班倫勁射畀馬田奧臣喺白界線前解圍，「金絲雀」中堅巴桑禁區手球又冇判12碼畀水晶宮，老實講佢哋冇分落袋係幾唔抵，亦都證明水晶宮喺佩尼斯領軍之下已經變得有侵略性。適逢今場波係佩尼斯上任之後，首次喺史靴斯公園同球迷見面，佢梗係想用勝利獻畀Fans啦，照計返到主場肯定會踢得比上仗更進取。
韋斯咸「高爾」齊入波擔正

韋斯咸唔叻得幾多，家陣都係排喺下游，所以對住咁高咁大嘅水晶宮肯定唔會客氣。佢哋上周六大炒富咸3:0終止兩連敗頹勢，最令「錘仔躉」鼓舞嘅，就係自從傳出韋斯咸可能買番丹巴巴亞之後，祖高爾同卡頓高爾喺壓力下齊齊有波入，英國傳媒話領隊艾拿戴斯為咗獎勵「孖Cole」，今場會派佢兩個擔正。「孖Cole」翻生，水晶宮又肯攻，呢場「大」騷實做得成啦！
Data King 水晶宮10戰半場不勝

‧上一次水晶宮喺正式賽事主場輸畀韋斯咸要追溯番1991年。

‧韋斯咸連開3口大。

‧水晶宮近10仗都未試過半場領先。
乜都玩錦囊 韋斯咸作客唔掂讓唔起

睇番戰績，韋斯咸今季6場英超作客賽事贏得1場，對上一次喺正規賽事作客砌低水晶宮亦已經係22年前嘅事，水晶宮「+1」有1.53倍當然穩陣啦！