博圖盧茲1.95倍「讓客」冇蝕

猪拉多纳

里昂收起主力等賣零威脅

里昂日前喺法甲淨吞巴黎聖日耳門4蛋，賽後更被PSG教頭白蘭斯怒寸零威脅，不過輸波輸面子嘅會長歐拿斯一於懶理，照樣暢談箭頭巴菲迪比高美斯嘅「銷售進度」，今晚聯賽快車迎戰強勢反彈嘅圖盧茲，極有可能繼續收起呢名強力射手，鋒力信唔過寧博1.95倍「讓客」。

（TVB301周五凌晨4:00直播）

白蘭斯喺PSG大勝里昂4蛋後勁寸嘴咁話：「里昂都冇威脅嘅，話咁易畀人搶走個波，空位又多。」不過，里昂會長歐拿斯似乎唔多在意，喺最近受訪時繼續將箭頭巴菲迪比高美斯「吊高嚟賣」：「收到韋斯咸開價買高美斯？唔係冇可能o架，我哋近期都收到幾個開價。」

現時唔少外國傳媒都話，里昂喺冬季轉會窗重開前，都會收起呢名法國射手，驚佢有咩冬瓜豆腐賣唔到好價錢。需知道高美斯向來係里昂嘅進攻核心，目前改由略欠火候嘅拿卡錫迪擔正攻堅，鋒力削弱唔少，主勝捧唔落手。
圖盧茲賓耶達回勇中三元

相反成個11月未贏過波嘅圖盧茲，日前喺聯賽大炒索察五個一皮盡掃頹風，箭頭賓耶達連中三元演出勇猛，再者前鋒蘇古納同翼鋒米夏洛文兩件傷兵並非正選主力，陣容齊章狀態回勇，硬撼里昂呢支褪色班霸唔輸蝕，受讓值得捧場。