敲維羅納2.9倍W圖「利」

猪拉多纳

今晚意盃第4圈有場森多利亞主場鬥維羅納，今季長時間喺護級漩渦掙扎嘅森多利亞，為咗留力下場對卡坦尼亞嘅「榜尾大戰」，今晚隨時無心戀戰。相反最近鋒力有起色嘅維羅納可以強陣出擊，2.9倍客勝敲得過。（開賽時間：周五凌晨4:00）
森多留力聯賽未必搏

連續5場不勝嘅森多利亞目前排喺意甲尾2，佢哋下場就要同「包尾大幡」卡坦尼亞踢「榜尾大戰」。呢場6分波咁重要，試問成班波上下仲邊有心機兼顧意大利盃？主帥米赫洛域隨時收起幾件主力，畀雪到硬晒嘅後備馬利斯卡、守將馬迪亞斯洛迪古斯等落場，鬥心成疑唔似惡得出樣。事實上，森多利亞今季防線表現極差，至今只得兩場保持到清白身，後防隱憂唔少。

維羅納雖然經歷3連敗，不過佢哋上場作客費倫天拿火力返晒嚟，踢少1個都係僅輸3:4。佢哋今場波可以「夫添」出擊，加上首席射手佐真奴費路亦打破入球荒，配合老牌前鋒東尼攻堅，有力威脅森多利亞不穩嘅防線，戰意唔成疑問，水鬥水寧捧當頭起冷敲客W。
意盃、英總賽制

意盃今輪為第4圈賽事，英總今輪為第1圈重賽。以上賽事若90分鐘內打成平手，則加時再戰，再和則以互射十二碼分高下。