哨牙蘇發威紅軍大炒格

猪拉多纳

利物浦有神級哨牙蘇，對韋斯咸續演入球騷！利物浦上仗主場大炒諾域治5比1，蘇亞雷斯食出「大四喜」再加一球助攻，睇到球迷嘩嘩聲，今晚紅軍主場對韋斯咸，呢位神級前鋒又有得大開殺戒，大盤捧得過！

自停賽復出後，蘇亞雷斯入球從此停不了，踢咗九場波就以十三個入球暫成英超神射手，呢十三個入球更等於熱刺全隊今季聯賽總入球，認真誇張！有個咁「神」、咁弗嘅阿蘇，紅軍冇咗史杜列治都唔怕入唔到波，再加上紅軍經領隊羅渣士一季嘅調較後，已經唔再係以前守強攻弱嗰隊，今季英超總入球數僅次於億萬大軍曼城，而主場攻力就更勁，主場七戰入咗十八球，平均每場入二點五球以上，對住近排勁頹嘅韋斯咸，一於繼續「有殺錯，冇放過」！
韋斯咸近仗輸鑊甘

韋斯咸近四場輸足三場，跌到落聯賽榜尾四，對住車路士、曼城、愛華頓呢啲前列球隊均失三球，所以紅軍無論靠晒阿蘇一個，定係靠謝拉特、古天奴等中場，要入波一啲都唔難，加上兩軍近七次對碰有六次開大，今仗續捧入球大﹗
now 622直播