「黑貓」冇前冇後唔夠熱刺鬥

猪拉多纳

熱刺慘吞曼城6蛋後痛定思痛，近3仗取得2勝1和佳績，今晚喺英超作客對住防守勁差嘅新特蘭，有力再贏多場，1.77倍客勝值得支持。

（now621台周日凌晨1:30直播）
熱刺攻擊力回升

最近回勇嘅熱刺近3仗場場入2粒，一改季初鋒力欠銳問題，上場反勝富咸更令士氣大振。一度傳出同球員不和嘅領隊保亞斯，陸續得到戰將聲援，繼中場迪比利、門將費度開腔後，上場射入加盟後首個英超入球嘅中場賀治比亦支持呢位葡萄牙少帥，賀治比話︰「佢令我哋更團結，大家都認同佢嘅足球風格。」球員咁齊心，隊波勝算當然更高啦，事實上，保亞斯上仗已經改派射手迪科爾掛帥攻堅，又有中場伊天卡普爾復出，攻擊力更有保證。

上仗輸波跌落榜尾嘅新特蘭，喺新帥普耶執教下，防守依然冇咩改善。「黑貓」暫時同諾域治一樣失咗28球，並列英超最差。而且佢哋亦係聯賽入面射門中框最少嘅球隊，至今只得33次命中目標，難怪近5場聯賽3場食白果，今仗主場都冇本事爆冷。