兵工廠食硬拖肥糖

猪拉多纳

好恨捧盃唔怕地獄賽程

英超一哥阿仙奴喺12月份將面對地獄賽程，希望力保榜首地位過新年，而頭關會於主場迎擊愛華頓，主帥雲格特別強調一眾將士心態上並冇鬆懈，班兵恨捧盃恨到發燒，心願未成會繼續保持作戰狀態。「拖肥糖」上場戰勝曼聯贏來有啲運仔，今次冇咁好彩，捧主W！

（now 621周一凌晨零時直播）
近4場贏晒 禾仔擔正

阿仙奴嚟緊幾場波都好惡踢，今輪先鬥愛華頓，周中又要作客拿玻里，踢歐聯出線關鍵大戰，跟住返聯賽又要作客曼城，場場都係硬嘢，對一眾「槍手」係極大考驗。不過，「兵工廠」開季戰績理想，現時於聯賽榜領先次席車路士4分，雲格強調班波充滿飢渴感，勁想贏晒每場賽事，唔擔心班球員心態上會放鬆。佢上場收起部分主力，連後備射手「中堅賓」賓特拿都有貨交，足見大軍不論正選或副選都操到好弗。

計晒聯賽同盃賽，阿仙奴近4場贏晒，每場最少入兩粒，而且4戰都冇失波，攻守發揮極為對辦。球隊傷兵問題續有改善，現時只剩右閘沙格拿、中場阿歷士張伯倫、戴亞比等人未掂。而星級射手禾確特今仗仲有望重返正選陣容，德國射手普多斯基亦可復出候命，加上大軍現時個勢好銳，只要踢番應有水準，絕對唔怕任何對手。
伏魔消耗大 回唔切氣

愛華頓上場作客奧脫福砌低曼聯，踢出本季代表作，「紅魔鬼」有幾次攻門勁有威脅，「拖肥糖」唔失波有運。呢班波踢法效率超高，前面擺「小魔獸」盧卡古衝鋒陷陣，效果都幾理想，不過，佢哋上場都搏得相當盡，匆匆再戰又係作客，未必回得切氣，體力肯定輸蝕，估計頂唔住「兵工廠」強攻，呢場主勝穩陣。

雲格：球隊自2013年初起表現平穩，本星期對我哋好關鍵，依家先要過愛華頓呢關，班波有質素再做好啲，最緊要保持飢渴感。

馬天尼斯：我哋希望以最強人腳征戰英超，雖然白賴仁奧維度做得好好，但我唔會考慮放走巴尼斯，我嘅諗法從來都冇改變過！