國體會救命有邦手

猪拉多纳

對手篤定降班當水泡

巴甲今晚煞科，除咗高士路穩奪冠軍、邦迪比達及紐迪高篤定降班外，剩低自由盃參賽資格及降班席位要踢埋最後一輪先知結果。目前排聯賽榜14位嘅國際體育會積分上仲未抵達安全線，主場面對篤定降班、兼且要留力南球盃決賽嘅邦迪比達，有力大勝一場宣布上岸，波童捧讓球主勝。

（周一凌晨3時開賽）
人腳唔差主場攞尾彩

巴甲最尾四隊來季要降落乙組比賽，目前肯定降班嘅有紐迪高和邦迪比達，剩番兩個席位由13位嘅波圖基沙至18位嘅富明尼斯都有危機。國際體育會現時排14，比起尾四嘅華斯高多3分，由於兩軍嘅勝出場數都係11場（巴甲同分先計勝出場數），加上緊隨其後嘅基斯奧馬、哥列迪巴都只係落後1至2分，國體會一旦輸波，隨時會被後面幾隊從後趕過，故此心態上唔可以放鬆。

國體會人腳其實唔錯，前鋒科蘭、李安度達美奧都係國腳級人馬，中場由阿根廷嘅好波之人迪阿歷辛度領軍，後防則有國家隊成員基巴及老將祖安壓陣，依家竟然淪落中下游，就算唔係搶分護級，煞科日當然亦希望喺主場球迷面前踢番場好波。
邦迪比達留力南球盃

邦迪比達聯賽早已返魂乏術，不過南球盃就成功殺入決賽，嚟緊周中佢哋便會作客阿根廷拉魯斯進行次回合，睇番上周首回合前一輪聯賽，佢哋於主場淨吞波圖基沙兩蛋，似乎早已採取半放棄態度，今次作客更加唔慌會去盡，國體會主W只得1.2倍熱得有道理，一於進取啲捧讓球主勝。