漩渦圖創歷史唔赦不死鳥

猪拉多纳

今日東京國立競技場上演日乙升班附加賽王者戰，京都不死鳥同德島漩渦爭奪來季日職最後一席，漩渦矢志成為四國史上首支日職球隊，而由於附加賽有特別賽制，佢哋今戰許勝不許和，決心更勝對手，受讓必捧讓球客勝！

（有線61及201台周日下午2時30分直播）

未分析場波前，先同大家講番日乙附加賽特別賽制，若果今場最後打和，會由聯賽排名較高者取得升班席位，換言之三哥京都不死鳥只要唔輸就可重返日職，而四哥德島漩渦就非勝不可。兩軍上場附加賽都同對手打和，同樣成為「和波由較高排名者晉級」規例的受益者，雙方都唔算搏得好盡。
衝四國史上首支日職球隊

德島漩渦身處日本四國，四國史上未試過有球隊參戰日職，漩渦王牌前鋒津田知宏話明要創造歷史，論名氣佢哋唔及京都不死鳥，但踢落不落下風，兩軍今季聯賽先後兩次交手，漩渦取得一勝一和。不死鳥季尾留力留出禍，上場若非門神吳承勳屢救險球已經拜拜，今戰讓波靠唔住！