賽程編排好「槍手」警覺高

猪拉多纳

阿仙奴啱啱周中喺輪換一半陣容，都輕取作客不濟嘅「紙老虎」侯城，當日最令Fans擔心當然係超過一千日未有為「兵工廠」入波嘅賓特拿擔任正選，好彩「中堅賓」只係用咗兩分鐘就將廠迷嘅「驚」變成「喜」。計埋賓特拿嘅入波，阿仙奴今季已有12名球員喺英超入波，追平咗上季整季入球人數，相信嚟緊禾確特復出，「兵工廠」火力會更犀利。
中場雙「斯」擦出火花

「兵工廠」今季火力大躍進，同中場效率大幅提高有關。奧斯爾加艾朗藍斯呢對中場核心成功擦出火花，「死神藍斯」已跨季連奪5月球隊最佳球員殊榮，進步幅度大，至於奧斯爾雖然控球時間唔多，但佢嘅致命傳送尤其重要，加埋辛迪卡索拉、路斯基、或年輕有活力嘅韋舒亞不斷走位拉開敵方防線，令「兵工廠」中場掌控能力榮升英超之冠。

當然，賽程編排亦有利提升阿仙奴警覺性。好似卡迪夫城、侯城同修咸頓呢啲對手往往令曼聯或利物浦失分後，跟手先鬥「兵工廠」，令「槍手」唔敢掉以輕心，直接減少對中下游球隊失分機會。今晚對手愛華頓最近同樣令「雙紅」先後失分，季初又搞到莫連奴初嘗回歸英超後首敗，相信阿仙奴必打醒十二分精神。