加拉塔沙雷祖記忘情互片

猪拉多纳

地獄球場生死戰 勢演入球騷

歐聯分組賽去到最後一輪，今晚重頭戲上演「意式風情」生死大戰，B組意大利名帥文仙尼率領土耳其勁旅加拉塔沙雷，喺佢哋嘅地獄主場硬撼意甲豪門祖雲達斯。文仙尼去土國執教嘅首仗正係首循環作客逼和祖記2比2，佢對祖家球隊非常熟悉，更何況今仗佢哋非勝不可，必會擺大個頭盡地一煲。祖記和波都掂，本可大打穩守突擊，但維達爾、泰維斯、洛蘭迪狀態當弗，相信可以喺鬆散嘅加軍後防搵到食，捧入球大。

（有線62及202台周三凌晨3時45分直播）
非贏不可 文仙尼焗攻

文仙尼以往執教國際米蘭及曼城，喺歐聯表現都乏善可陳，但轉投加拉塔沙雷後反而有唔錯演出，除咗作客同祖記打成平手，主場亦贏哥本哈根3比1，即使作客輸畀皇馬，但場上形勢一啲都唔輸蝕，因此今次千祈唔好睇小文帥。加拉塔沙雷現時只係落後次席祖雲達斯2分，換言之今仗必須全取3分先至可以晉級。文仙尼冇得揀下，必須先下手為強，盡快打開紀錄，否則一旦被祖記企穩陣腳，更難咬得佢哋入。

加拉塔沙雷鋒線人腳不俗，除咗大家熟悉嘅杜奧巴，仲有布拉卡爾馬斯、烏密布魯特，前者上屆歐聯有8球進帳，同美斯一樣名噪一時。烏密布魯特今屆兩破皇馬大門，首循環亦入過祖記波。文仙尼手上不乏進攻好牌，配合「地獄主場」氣勢，足以撕破對手防線。
攻擊鐵三角 誓搶士哥

祖雲達斯雖然和波都出線，但未必會死守，皆因佢哋防線亦唔係好穩，5場分組賽場場有失波，睇怕頂唔住搶分心切嘅加拉塔沙雷，與其係咁不如以攻代守，何況「斑馬兵團」嘅攻擊鐵三角維達爾、泰維斯、洛蘭迪近況大勇，輪流發威入波。加拉塔沙雷推前焗攻情況下，隨時畀呢幾位射手更大嘅活動空間，爭取「士哥」似乎唔係咁難。由於雙方都有入球意欲同本錢，大盤係今場嘅最佳選擇。