小組爭一哥？為乜要咁搏！

猪拉多纳

拜仁攻城列貝利Show　Time

兩支小組一哥搏唔搏？歐聯最後一輪分組賽，A組一哥曼聯同D組阿一拜仁慕尼黑已肯定出線，今輪拿多一分就可取得首名席位，兩班波同樣有主場優勢，牌面條件都係較佳，不過心態隨時會影響兩軍演出，到底佢哋會唔會照樣強陣搏殺爭首名呢？

今晚歐聯D組矚目大戰，衞冕嘅德國班霸拜仁主場火併英超勁旅曼城。雖然曼城仍有機會爭小組首名，不過拜仁球星列貝利剛傷愈復出，為咗幫自己喺國際足協金球獎選舉前造勢，一定搏甩髀，加上「藍月亮」作客出名曳，實畀拜仁玩到團團轉，斯維直取讓球主勝。

（有線61及201台周三凌晨3時45分直播）

先講吓D組形勢，拜仁與曼城已經篤定出線16強，當然「藍月亮」喺數字上仍有機會爭首名，但條件係今場唔單止要贏波，仲要淨勝三球或以上，睇番佢哋連盃賽在內，今季十仗作客贏得四場咁大把，作為一支爭標球隊實在唔合格。剛於聯賽作客修咸頓早段靠阿古路入波領先，點知又係虎頭蛇尾攞唔晒三分，主帥比歷連尼太過着重進攻嘅戰術，令後防漏洞表露無遺，經常畀對手有機可乘，西布朗、卡迪夫城、修咸頓都搞到曼城亂晒龍，更何況係上屆歐聯盟主拜仁？
搏甩髀同Ｃ朗爭金球獎

拜仁主力舒韋恩史迪加同洛賓因傷缺陣，但完全冇影響佢哋嘅強大火力，上周六先喺聯賽作客以7比0大炒雲達不來梅，殺聲震天，啱啱傷愈復出嘅列貝利不但梅開二度，仲交出兩次助攻，非常餓波。今屆國際足協金球獎爭持激烈，雖然投票已經截止，但勁敵C朗前排士哥頻頻，來勢洶洶，列貝利亦不敢怠慢，今仗對住強隊曼城備受關注，正係畀佢騷哥利嘅最佳舞台，為爭獎造勢，戰意唔使懷疑，何況拜仁上次作客都贏「藍月亮」3比1，冇理由返主場贏唔到兩粒，讓球主勝有買趁早。