利華絕地搶W冇甩蘇

猪拉多纳

德甲球隊上屆歐聯威到盡，但今屆較為遜色，除咗拜仁慕尼黑保持水準之外，另外三隊演出麻麻。A組利華古遜今仗作客皇家蘇斯達，就算贏波都未必出到線，不過德國人勝在專業，極講求體育精神，相信仍會盡力一戰。更何況蘇斯達已篤定包尾出局，睇怕唔會作無謂反抗，不如留力踢好西甲，力爭下屆捲土重來好過，一於捧客勝。

（有線63台周三凌晨3時45分直播）

利華古遜現時落後次席薩克達一分，換言之除咗自己贏波之外，仲要寄望薩克達失分，先至可以反超前出線，形勢比較被動。不過來到最後關頭，球隊上下都唔會諗咁多，最重要做好自己，攞咗三分再講。雖然利華古遜唔係屬於歐洲一線勁旅，鬥曼聯等名牌處於下風，但比上不足，比下有餘，要贏蘇斯達呢類歐聯稀客，仍然相當有把握。呢支現時德甲二哥當頭起，近五仗贏四仗，包括上仗擊敗多蒙特，狀態當弗，值得睇高一線。
蘇斯達出局無謂搏

至於皇家蘇斯達，佢哋踢歐聯附加賽表現搶眼，細鬼曾經都好欣賞佢哋，不過踏入分組賽就現晒形。畢竟蘇斯達人腳有限，難以兼顧聯賽及歐聯兩條大戰線，加上歐洲賽經驗不足就更加輸蝕。蘇斯達喺歐聯一早出局，對球隊可能係一種解脫，可以將集中力放番西甲，希望入番前四，下屆再戰歐聯，今仗無謂嘥氣阻人發達啦！