洛蘭迪弗爆撐祖記

猪拉多纳

加拉塔沙雷死火仲要攻？

今晚歐聯B組會由土耳其嘅加拉塔沙雷同意甲勁旅祖雲達斯合演生死戰，爭奪次名出線資格。「加拉」為出線非勝不可，但想贏同贏唔贏到係兩回事，面對銅牆鐵壁嘅祖記，焗攻隨時畀Fit到爆嘅長人中鋒洛蘭迪有機可乘，一於直取1.77倍祖記客W。

（有線62及202、中央5台周三凌晨3:45直播）

睇番B組形勢，加拉塔沙雷暫時落後祖雲達斯兩分排第3，今仗喺主場出擊焗住要搶攻，但如果大家仲以為佢哋個土耳其電訊球場係「地獄球場」嘅話，Sorry，絕對唔係囉！加拉塔沙雷目前喺土超排第3，5次主場勝仗入面有4場係僅贏對手1粒，喺土耳其都唔係咁惡喳喎！
傳球員夾計想踢走文仙尼

仲有，佢哋今季喺土超14戰入得22球，係前4分子入面入波最少嗰隊，究其原因，真係多得教練文仙尼唔少！大家都知呢位意大利佬係幾咁保守，你畀10個前鋒佢，佢都係打單箭頭，今季夠膽死搵去季首席射手布拉卡爾馬斯打左翼，想多波入都難啦！加拉塔沙雷早排喺土盃只係憑12碼險勝甲組仔加辛塔BB，班球迷猛咁柴文帥台，狂嗌泰林個名希望呢位60歲土耳其國家隊教頭回歸，聽講唔少手足都好想文仙尼冇得撈，陣營士氣真係幾曳吓。
銅牆鐵壁近7場意甲零失球

雖然話祖雲達斯今屆歐聯表現麻麻，去到第5輪賽事先砌低哥本哈根開齋，但呢支意甲班霸勝在穩打穩紮，一條由基亞連尼同保方領銜嘅防線好穩陣，最近7場意甲0失球，加埋今仗只要和波都夠出線，壓力自然冇加拉塔沙雷咁大。最重要係教練干地一早為場波做好部署，上場意甲贏博洛尼亞就將泰維斯、洛蘭迪同邦路斯等主將擺喺後備，擺明養精蓄銳砌「加拉」。當中洛蘭迪由11月到依家已經入咗4球，腳風順成咁，加拉塔沙雷焗攻起上嚟隨時畀佢同泰維斯有機可乘。
Data King 「斑馬兵團」歐聯例有入波

‧祖雲達斯近12場歐聯分組賽都有波入。

‧「斑馬兵團」連開7口半場細。

‧加拉塔沙雷係歐聯B組失波最多球隊（14球）。
乜都玩錦囊 祖記防守硬淨可吼細

祖雲達斯和波夠出線，今場肯定唔會輕舉妄動，以佢哋嘅防守力亦足以頂得住加拉塔沙雷嘅進襲有餘，1.93倍細博得過。