拜仁超班再下一「城」

猪拉多纳

今晚歐聯D組上演最後一輪賽事，由「德甲一哥」拜仁慕尼黑主場迎戰「英超新貴」曼城。拜仁喺小組5戰全勝，之前作客將「藍月亮」玩弄喺股掌之中，輕描淡寫以3:1取勝，盡顯王者風範。而且上周德甲作客狂派7隻蛋畀雲達不來梅後，巨頭路明尼加更趁機與一眾戰將開聖誕派對慶祝，球隊狀態士氣勇達巔峰，點可以唔撐拜仁嘅1.95倍「讓主」呀！

（有線61及201周三凌晨3:45直播）
曼城作客衰飄忽

拜仁自7月尾至今未輸過，和波都只有3場咁大把，事關佢哋板櫈深度足，冇話冇邊個球員會影響整體發揮。陣中文迪蘇傑、列貝利同湯馬士梅拿輪流入波，而潛質優厚嘅馬里奧葛斯經過一輪適應，近期亦開始交出「士哥」，就算有洛賓、舒韋恩史迪加等打柴都冇有怕。後防方面，近7場只係失咗1球，證明由紐亞所領導嘅防線，有如銅牆鐵壁，有力抵抗阿古路、尼格度等曼城射手進襲。

曼城由比歷連尼執掌帥印，首要目標係突破歐聯分組賽，雖然經已達標，但仍然有唔少問題等住解決。其實「藍月亮」近況唔錯，近5場4勝1和，上仗聯賽被修咸頓逼和終止4連勝。不過論作客成績，近5場只得1勝2和2負，作客表現始終唔夠穩定，今晚作客勢如破竹嘅拜仁，情況並唔樂觀。