「天鵝」讓唔起寧撐聖加倫

猪拉多纳

攞1分即出線未必鍊盡

歐霸盃今晚上演最後一輪分組賽激戰，其中英超史雲斯就要喺A組作客聖加倫，期望趕上尾班車。「天鵝兵」今場出線形勢有利，幾乎輸波都可照樣過關，力奇實在有多少懷疑佢哋班兵嘅戰意，最慘係前線雙星米捷同韋菲特邦尼都可能缺陣，讓波博1.8倍「讓主」好過！

（有線61及201周五凌晨2:00直播）

A組榜首華倫已經肯定首名出線，剩番一個席位就由8分嘅史雲斯同5分嘅古賓爭奪。由於史雲斯同古賓對賽兩場都係和1:1，若然最終兩隊同分就會計得失球，依家「天鵝」有多3個淨得失球差喺手，即係話就算古賓作客贏到華倫，史雲斯唔輸大大鑊都有權出線，今戰求勝心肯定成疑。
史雲斯雙箭缺陣想贏都難

再者史雲斯分組賽頭兩場係威係勢連攞6分，不過之後就現晒形3戰攞得2分，實力其實未必有想像中咁巴閉。加上射手米捷因傷抖完5場，上周聯賽復出對侯城就即刻踢足90分鐘，主帥米高盧特立都話今晚或者會畀佢抖抖，最慘係另一個箭頭韋菲特邦尼都有肌肉傷隨時缺陣，想贏都未必夠本錢。

主隊聖加倫提早畢業勝在冇乜負擔，輕裝上陣隨時會有驚喜。睇番佢哋主場戰鬥力始終唔差，之前主場對華倫都曾經一度領先2:1，只係因為下半場打少個，臨尾先畀華倫入兩球反勝3:2，今鋪同「天鵝」和氣收場真係一啲都唔出奇！
威爾斯球隊征瑞士不勝

‧歷來威爾斯球隊曾兩次作客瑞士，只得1和1負。

‧聖加倫過去曾兩鬥英超球隊，與車路士兩戰各勝1場，總比數淘汰對手。

‧聖加倫分組賽主場兩戰1勝1負，每仗均入兩球。

歐霸盃A組