勝利士氣旺實砌光輝

猪拉多纳

呢幾個星期雖然妹頭因為跟咗娛樂台出外拍旅遊特輯，所以喺澳職直播見唔到我，但係我一直都有緊貼留意啲賽事o架，聽老闆話，今季加強直播場次之後，收視繼續節節上升，今日周五「特別場」係墨爾本勝利主場對珀斯光輝，兩隊近況都係麻麻哋，咁到底邊隊可以反彈呢？

（有線64及203台周五下午4時30分直播）

勝利上輪居然輸畀紐卡素噴射機，班球迷當然跌晒眼鏡，但原來上星期係佢哋今季第一次去到能源球場出戰，雖然最終輸波，但其實喺比賽中都佔盡優勢o架，可惜足球唔係計點數係計入波呢，咁當然，勝利仲有之前作客摸和過中岸水手，都算係意料之外嘅收穫。
光輝客場未開齋難靠

教練梅斯卡特接手勝利後有適應期好正常，成績係就係唔多好睇，但澳職勝在只要及時修正，爬返上去嘅機會都好大，若果能延續上星期喺能源球場出戰嘅士氣同表現（千祈唔係戰果），勝利今日嘅情況又未至於太壞。

至於珀斯光輝都係擺脫唔到近年嗰陣海鮮味，上星期打敗遠道而嚟嘅威靈頓鳳凰，係佢哋近五場以來嘅首勝咋。大家都知光輝喺澳洲西部，每次作客都要飛大長途，今季客場成績都係估計到啦——就係未打開勝利之門！翻查上季紀錄，光輝成季作客都只係贏得3場咁大把，所以今日睇雙方近況同實力，都唔好得過對方好多喇，但妹頭就因為作客呢個問題而睇淡光輝啦！