拉體會鄉親面前做大騷

猪拉多纳

另一場半準決賽由東道主拉查體育會鬥中北美代冠軍、來自墨西哥嘅蒙特雷。今次係蒙特雷連續第三屆以中北美聯賽冠軍身份參加世冠盃，上屆佢哋攞到中北美洲代表歷來最佳成績季軍，足證隊波有相當實力。
蒙特雷雙煞夠卡士

目前蒙特雷陣中較為人熟悉有智利國腳漢拔圖蘇亞素及前里昂前鋒施薩迪加度，前者喺今屆贏得中北美聯賽冠軍盃嘅晉級路途上入咗五球，係球隊捧盃最大功臣，後者當年於法甲搵食時亦不乏佳作，有呢兩位好手壓陣，蒙特雷唔愁冇波入。

東道主拉查體育會上輪憑補時階段入波絕殺大洋洲代表奧克蘭，狀態同信心都漸入佳境，喺主場球迷支持下唔會龜縮。睇番蒙特雷對上兩屆五場世冠盃賽事，一共同對手泡製咗16個入球，平均每場有三個士哥，今場捧大盤啱數。

（周日凌晨3時30分開賽）