維拉曼聯搶W互攻 大盤可期

猪拉多纳

曼聯今季未好過，嗰頭歐聯贏波，但射手尹佩斯又話受傷，要抖1個月，慶幸朗尼坐完波監，今晚英超可復出作客鬥阿士東維拉，令「魔粉」存有一絲希望。事實上，只要呢位英格蘭前鋒在陣，曼聯整體進攻會暢順好多，經過聯賽主場2連敗後，紅魔已經再冇退路，領隊莫耶斯焗攻求勝以保帥位。問題係紅魔防線勁曳，恐怕睇唔住維拉當弗射手賓迪基，曼聯讓波唔穩陣，寧博入球大。

（now621周日晚9時30分直播）

論往績，曼聯佔盡上風，雙方近7次交鋒錄得6勝1和，當正維拉係「私房菜」。問題係紅魔水準今非昔比，防守退步非常明顯，對西布朗、史篤城、富咸、卡迪夫城等二三流角色，都保唔到清白之身。
主場砌低過曼城

事實上，曼聯防線人腳捉襟見肘，里奧費迪南、尼曼查維迪經常受傷，莊尼伊雲斯、基斯史摩寧又未夠班，依家連左閘艾拉都傷埋，大門認真危危乎。

好消息係朗尼停賽完畢，有佢指揮及組織攻擊，仍具侵略性，贊奴沙、查維亞靴南迪斯亦不時有佳作，攻力有保證。有傳如果球隊未來一個月成績再冇改善，領隊莫耶斯就會被炒，佢已經冇得揀，每場都要贏，作客都照搶攻。

不過，維拉亦唔係坐以待斃，今季佢哋試過喺主場放膽同曼城鬥攻，結果贏埋3比2，因此估計佢哋今次一樣會豁出去一博，同曼聯鬥攻，爭取打破被對方食住嘅宿命。事實上憑住前鋒賓迪基步大力雄，攻門把握力強，肯定會畀到脆弱嘅曼聯防線好大壓力，預計雙方會踢得開放，入球大好路。