拜仁3.95倍讓球和啱胃口

猪拉多纳

FC廣州雄心壯志輸質素

周三凌晨世冠盃準決賽於非洲摩洛哥爆發，一場標誌中國足球新一頁嘅大戰，ＦＣ廣州（廣州恒大）挑戰拜仁慕尼黑，雙方實力同經驗有明顯差距，歐洲冠軍拜仁做足準備強勢而臨，恒大爆冷機會微乎其微，不過恒大教頭納比係老狐狸，面對強敵唔會輕易投降，黑柴相信拜仁會贏，但恒大亦有望憑好表現贏得尊重，今場波觀賞價值大於菠菜，讓球主客和拜仁讓兩球係合理盤口，黑柴建議小注有好分頭嘅3.95倍讓球和。

（廣東體育頻道周三凌晨3時30分直播）

對於拜仁嚟講，今場最蝕底之處係比賽前兩日至飛抵摩洛哥，適應氣候方面比起較早抵達兼踢多一場初賽嘅ＦＣ廣州較為輸蝕，不過呢支歐洲冠軍經驗豐富，有能力克服困難。拜仁今年已經先後贏過歐聯、德甲、德國盃同歐洲超級盃，對於教練哥迪奧拿嚟講，挑戰五冠王係佢超越上屆教頭軒歷基斯完美成績嘅最佳捷徑，對今場賽事極度重視。

為咗世冠盃，拜仁上周末聯賽對漢堡時刻意留力，國王列貝利只喺下半場落場卅分鐘，有疲態嘅阿拉巴同馬天尼斯都冇落場，矛頭直指今仗，球隊除咗洛賓同舒韋恩史迪加兩大主力缺陣外，陣容相當完整，球隊上下都講明唔會輕敵，而且賽前更重點研究防守，相信ＦＣ廣州偷雞機會唔高。

ＦＣ廣州喺富豪班主許家印同國家支持下創造歷史，成為首支參加世冠盃嘅中國球隊，佢哋喺初賽以兩球淨勝第五度參戰世冠盃嘅非洲冠軍艾阿里，贏得相當有說服力，尤其三名南美外援孔卡、艾傑臣同穆里奇贏盡讚譽，前兩者分別取得入球，後者仲貢獻兩個助攻，呢三位星級外援係ＦＣ廣州取得空前成績嘅重要功臣，不過球隊最大本錢係星級教練納比，佢嘅調兵遣將功力已屆爐火純青，令每名球員都可以盡展所長。
重視中國市場見好即收

廣州今仗以輕裝上陣，首要任務係向世界展示中國足球嘅進境，但始終本土球員質素同經驗，與拜仁相距太遠，今場輸得唔難睇已足交代。拜仁近年重視中國市場，同ＦＣ廣州關係良好，今場志在贏得穩陣，確保打入決賽資格，唔會刻意大炒對手。ＦＣ廣州限於實力同經驗，預期給予拜仁既威脅有限，今場最有可能出現嘅賽果係拜仁贏2比0或3比1，讓球和有好分頭不妨小試。