尊兄有買趁手

猪拉多纳

　　今晚未必有雨落，場地正常又點，谷中作賽往往係檔位抽獎，好馬、夠弗唔係代表一定贏，條件唔夾都係冇運行。所以，我經常強調，谷草揀馬實力雖屬首要，排檔優劣亦係主要考慮因素，當然，唔係唔理三七廿一，揀晒內檔馬就算。

　　第二場三班2200米。睇「幸運勝利」身形、腳法，大長途肯定勝任，而上季已跑過田草2000米，差贏埋添，今次增程跑多四百米，一都唔擔心。呢匹馬衰在走規頑劣，邊個騎佢一樣會斜跑，成為爭勝最大阻礙，好彩呢次排內檔，蔡仔早段要做好簡單，貼欄留後跟得順，跑到直路從內欄剷上，到時有冇位上，天知曉，希望可以憑後勁掃晒。

　　第三場四班1650米。「尊兄」初出跑得唔好，人與馬皆有責任，我唔會否定隻馬好新嫩，出閘快慢唔係騎師事，但係睇番直路蔡仔點騎先，未至於遊魂，但肯定冇心裝載！依我睇法，呢匹馬唔會係碎料，一旦成熟，連勝連升冇問題。呢匹有潛質之馬暫時未受注目，隔晚賠率仲係冷冷，估計臨場都係，有買趁手。

　　滿貫豐采跑法靈活

　　第四場四班1000米。「滿貫豐采」近仗演出好，唔係第一，就係第二，韋達表現亦係稱職，識得隨機應變，好似上場咁，遇到冇馬走，佢即刻走先，就此帶到。今次早段應該有好多馬會放，對佢冇所謂，後追都得，唔需要驚早段被燒瓜。但有一點要提出，呢匹馬已經好幾場，頂唔頂得順？冇人敢寫包單，臨場賠率太熱，自己要醒水。陳華棟資深評馬人