史篤城主場硬淨唔赦紅魔

猪拉多纳

另一場英聯盃8強戰由史篤城主場鬥曼聯，紅魔鬼上輪聯賽剛啱作客大炒阿士東維拉，挽回不少信心，不過佢哋陣中仍有唔少傷兵，為留力應付嚟緊嘅聖誕、新年快車賽期，未必會搏得太盡。史篤城主場表現向來甚硬淨，強如車路士、曼城今季作客此地都攞唔到甜頭，紅魔鬼冇必勝把握，波童捧讓球主勝。

（TVB 301周四凌晨3時45分直播）

曼聯上場聯賽作客大勝維拉3比0，除終止聯賽4場不勝頹勢，仲有因傷久未露面嘅費查復出，對紅魔粉絲嚟講當然係好消息，可惜前鋒尹佩斯因傷要抖1個月，前線得番朗尼、韋碧克同小將贊奴薩支撐大局，嚟緊快車賽期絕對唔易啃。
留力聯賽唔敢去盡

曼聯目前於聯賽落後榜首阿仙奴10分，能否保持衞冕希望，好睇未來呢幾場成績，喺非常時期踢「盃仔賽」更加唔敢去盡，估計會多派二線兵出場，直接影響爭勝機會。

史篤城今季主場硬淨，連盃賽在內9次主場出擊只輸1次，除季初曾打和曼城，早前3比2反勝車路士踢更出代表作。加上聯賽盃近年好多時由中型班奪冠，相信更會刺激史篤城挑戰錦標嘅決心。唯一擔心係往績對曼聯輸多贏少，心理上稍為輸蝕，不過自從今季西布朗、愛華頓、紐卡素都先後打破近年被紅魔剋死嘅宿命，多一支史篤城又有乜咁出奇？