輕彈錢笑虎入羊群

猪拉多纳

　　「有雷神，冇頭痕。」被馬迷稱為「雷神」的莫雷拉風頭已蓋過十三屆香港冠軍騎師韋達。剛周三夜賽，你看「氣勢如虹」可於莫雷拉胯下放頭贏，「一見鍾情」換他又輕鬆取勝，真的贏到你心服口服。莫雷拉可讓馬兒輕鬆來跑，不用在最後直路上以誇張動作催策鞭打，雖然長遠會否變質無人知，但既然現在搏開有勢，他跑埋今戰又停賽，無得拗頸須秤先。

　　第八場三班1200米，「輕彈錢笑」去季及今季均一出即勝，根本星味十足。試想想，以其前仗於三班狂勝對手表現，今場對手實在難匹敵。這場的其他熱門各有缺點，「龜兔競跑」前仗贏過，賺晒場地形勢，而牠大前仗季內初出那席第二名，完全埋不到「輕彈錢笑」身，所以上仗一排外檔即打回原形；「愛歡笑」本寄望甚大，奈何受傷患影響久未上陣，倘相隔一季無跑也贏，抵輸。

　　「寶貝王」要再進步先有得贏，因上場只負於首次升班作賽的「劍飛聲」獲亞，計埋其他蹄下敗將的實力，賽績完全唔夠硬淨；「信心十足」健康成疑，大閘平平，轉倉亦不宜高估。「輕彈錢笑」應可大勝而回。(廖浩賢)