蜚聲國際五班郁手

猪拉多纳

　　睇來睇去，今日好多場都係「爆格」，更重要係坊間所謂「雷神」效應，莫雷拉騎咩就熱咩，騎牛騎豬亦一樣，令到多場賠率側埋一邊，加深度馬難度。我唔係話雷神唔好，佢係難得一見高手，個樣又夠正氣，抵佢成為新偶像。

　　第一場五班1600米。「蜚聲國際」近賽欠佳，同阿成冇關，佢已經將呢隻馬集中跑此程，只係實力不如人，輸輸減夠分落五班，有唔同睇法，其實，又唔淨止我咁睇，連韋老哥都一樣，今季場場冇佢份，呢次降班即刻上去，為乜先？梗係想歷史重演，因為上季唯一贏馬就係佢。

　　另外，呢匹馬隔晚票數對辦，再唔係冷到冇人吼，亦係原因之一。

　　第二場四班1400米。「幸運日」初出左穿右插贏得係就係驚險，唔好忘記係佢第1次出賽咋，隻馬仲係「生勾勾」、兩頭fing，贏得到，全憑質素。上次跑輸，得番個P，蔡明紹要負責任，當時唔夠機警，誤盡機會。今次梗係想戴罪立功，唔係可能下次冇得騎，流失基本坐騎事大嘛！呢場佢實會跑得醒醒定定，鬥志可嘉。

　　贏得趁勢再搏

　　第七場三班1600米。「贏得」在第三班唔覺唔覺跑5場，跑得好佔多數，剛剛先至贏場1600米，今次又再，睇阿摩想趁勢再搏，應該唔會縮槓。

　　而呢匹馬最緊要係賽事形勢配合，咁呢場出馬唔多，步速好大機會拖得慢，晒佢大步大步擺前走，隨時又有機會帶到。（陳華棟 資深評馬人）