卡梅倫靠女人貼今周波膽

猪拉多纳

卡梅倫日前同奧雲去咗阿富汗睇英國士兵對阿富汗士兵嘅球賽，佢當時仲參加咗BBC一個特別節目，同著名BBC球評家羅蘭遜以及當地士兵齊齊玩估波遊戲，卡梅倫估波理據好特別，唔係睇戰績、狀態，而係睇女人﹗

卡梅倫首先講到西布朗對侯城一仗，雖然佢老婆鄉下啲人唔鐘意侯城，但卡梅倫為咗兩地能夠保持友好關係，佢充當「友誼大使」，揀侯城小勝1球。另外由於卡梅倫好鐘意諾域治主席、被稱為「英國方太」達莉雅寫嘅烹飪書，所以呢位忠實粉絲估諾域治W。

咁都未算離譜，佢喺估曼聯主場對韋斯咸一仗，正常人都會估曼聯贏，但卡梅倫就包拗頸捧對家，原因係韋斯咸女副主席嘉倫對英國商業有極大幫助，所以佢要支持錘仔，呢啲咁無厘頭嘅貼波理據，球迷真係聽到O晒嘴。
撐愛隊維拉W

不過，卡梅倫都有估啲正常賽果嘅，如身為阿士東維拉球迷嘅佢就梗係捧愛隊贏史篤城。講到榜首大戰阿仙奴對車路士，佢就認為車仔可以擊敗兵工廠。到底呢位英國首相埋單計數可以估中幾多場，星期二清晨咪知囉！
卡梅倫推介

利物浦 勝 卡迪夫城 2:0

水晶宮 負 紐卡素 1:2

富咸 負 曼城 0:3

曼聯 負 韋斯咸 1:2

史篤城 負 阿士東維拉 0:2

新特蘭 負 諾域治 0:2

西布朗 負 侯城 0:1

修咸頓 負 熱刺 0:1

史雲斯 勝 愛華頓 3:0

阿仙奴 負 車路士 1:2

註：前者主場