「#Mission5」拜仁超班炒起拉查

猪拉多纳

世冠盃王者終極戰！

拜仁「#Mission5」只差一步！世冠盃王者戰今晚喺摩洛哥馬拉喀什舉行，東道主球隊拉查體育會爆冷入決賽，向歐聯冠軍拜仁挑機。論實力，拜仁何止高幾班，何況拉查11日4戰體力輸蝕，以拜仁嘅超強火力，唔難大勝一場實現5冠夢，為2013年畫上完美句號！足智彩拜仁做「主隊」讓3球，力奇照捧2.1倍「讓主」！

（廣東體育周日凌晨3:30直播）

2013年已先後贏得德甲、歐聯、德國盃同歐超盃嘅拜仁，嚟到最後一關當然唔想甩拖。事實上，佢哋喺世冠盃前，已經用「#Mission5」嚟做社交網「標籤」，即係話畀全世界知，「拜仁一定要封王」！本來佢哋最擔心要同明尼路爭冠，點知依家失驚無神殺咗隊實力較次嘅拉查出嚟，主帥哥迪奧拿偷笑都嚟唔切啦！
拜仁輪換兩主將蓄銳搏殺

當然，大家可能會驚佢哋輕敵，不過賽前拜仁會長路明尼加已經叫班手足要集中，加上哥帥早喺4強戰留有後着，收起湯馬士梅拿同丹迪，今晚作為佢哋2013年嘅收爐戰，毋須再作任何保留，要炒起拉查又有幾難？

拉查接連淘汰奧克蘭、蒙特雷同明尼路的確令人喜出望外，不過力奇認為佢哋嘅神話係時候終結喇。睇番拉查贏蒙特雷已經要搞到加時先掂，到4強淘汰明尼路，又係靠問題12碼先贏波，今鋪拜仁只要做好準備，點會畀拉查偷到雞？
拉查蝦碌「追星」笑爆球壇

再者，拉查球員冇個有卡士，最「紅」嗰件就係門將艾斯基尼，佢喺2010年曾經因為撲出12碼後掛住慶祝，睇唔到個波「倒西」入網而成為網絡紅人，咁都未算好笑，拉查成班球員參戰世冠盃似係睇「星」多過踢波，上仗佢哋走去鬥搶細哨身上物品留念一幕，大家睇完應該都會心微笑，呢隊咁嘅嘢做到世界冠軍？咪玩啦！
Data King 惡「仁」今季場場喪入波

‧過去9屆賽事歐洲區球隊曾5奪冠軍。

‧拉查體育會係史上第2支殺入決賽嘅非洲球隊，08年厄瓜多爾利加大學入決賽以0:1不敵曼聯。

‧拜仁開季至今29戰場場有入波，當中有15場入3球或以上。
乜都玩錦囊 快刀斬亂麻半場大有計

拜仁實力超班，火力驚人，上仗對住廣州恒大（足智彩譯：FC廣州），半場就已經入2粒領先，今仗對住拉查，睇怕一樣可以快刀斬亂麻，1.6倍「半場大」有計！
世冠盃賽制

（六）49為季軍戰，若法定時間內打和，即以互射12碼決勝。（六）68為決賽，若法定時間內打和將加時30分鐘，未分勝負則互射12碼決定冠軍。