黃色潛艇發「維」向歐聯夢進發

猪拉多纳

今晚西甲維拉利爾喺主場迎戰西維爾，繼續向佢哋個歐聯席位美夢進發。「黃色潛艇」周中喺西盃晉級士氣唔錯，今晚返到主場應可大勝，一於撐佢哋2.9倍「讓主」啦！

（now632台周六晚11:00直播）
西維爾入得又失得

維拉利爾上場聯賽作客巴塞，一度憑梅沙基奧入波追和，可惜，最後畀尼馬再入一粒搞掂輸1:2。不過我想講講，其實成場波雙方根本係互有攻守，特別係「黃色潛艇」追和前一段時間，係完全壓住巴塞嚟踢，反映出佢哋狀態唔錯。仲有一點，維拉利爾陣內諸如佩比同杜斯山度士等都有上佳技巧同出色走位，可以不時為力量型嘅烏捷製造空位，況且中場大腦卡尼傳送功夫到家，對住西維爾想話入多幾球唔成問題。

相反，西維爾經過8場不敗之後，周中西盃次回合主場輸畀桑坦德0:2，兩回合以1:2出局，士氣受損在所難免。西維爾中前場有拿傑迪錫、卡路士巴卡等好手在陣，鋒力不俗。但係由費蘭度拿華路領導嘅防線極唔穩陣，可以話前面入幾多，後面失幾多，今晚作客攻擊力銳利嘅維拉利爾，唔知要喺個網執幾多次波呢？