曼城無阿古路照炒富咸

猪拉多纳

英超嚟到12月尾，又係緊張刺激嘅「聖誕快車」！曼城目前氣勢一時無兩，近3場比賽全勝，而且成日大炒到對手毫不留情，雖然今晚「藍月亮」對富咸係要作客，但係兩隊波嘅實力真係差天共地，就算曼城讓1球都夠贏有凸，一於捧曼城1.82倍「讓球客勝」！
板櫈深度夠調配靈活

面對咁密集嘅賽程，邊隊多人就梗係有着數啦，講人才多就冇邊隊夠曼城嚟，佢哋每個位置都有至少兩個頂級球星競爭，就連英格蘭國家隊首席門神赫特都要坐冷板，迪斯高、占士米拿同高拉洛夫等勁人都係後備。正所謂養兵千日，用在今時，聖誕快車咁多人替換，班球員就無後顧之憂啦。

雖然曼城王牌射手阿古路喺贏阿仙奴場波整親小腿，至少要抖成4個禮拜咁多，就咁睇真係好大鑊，事關佢依家喺射手榜僅次於蘇亞雷斯，冇咗阿古路真有一定影響。不過億萬大軍曼城勝在人腳鼎盛，無咗阿古路，仲有啱啱喺聯賽盃對李斯特城時梅開二度嘅迪斯高、仲有大衞施華、捷西斯拿華斯、拿斯尼同埋費蘭甸奴等好手添。
貝碧1月離隊士氣曳

另邊廂，主隊富咸今季成績非常差勁，荷蘭教頭梅倫史甸取代祖爾擔任領隊一職後，終於喺對維拉拎到近8場比賽首勝，不過上場又1:4慘敗愛華頓腳下，就連保加利亞射手貝碧托夫都話1月離隊，士氣簡直跌到落谷底。而且富咸今季主場同作客一樣咁渣，今晚佢哋對住億萬大軍曼城，就算受讓一球都唔夠啦，一於捧曼城「讓客」！