國米AC保帥大過天

猪拉多纳

落難豪門合演褪色打吡

意甲歇冬前壓軸之戰上演褪色「米蘭打吡」，國際米蘭掛名主場鬥AC米蘭，亦係雙方主帥「飯碗保衞戰」！兩支家道中落嘅豪門難兄難弟，踢未夠半季已經爭標無望，今仗成為兩軍教練馬沙利及阿里基最後救贖機會，贏波仲有望坐穩帥位過聖誕新年，若然失分好可能立即執包袱，大家都被逼入窮巷，勢必豁出去盡地一煲，互相搏拳，合演入球騷，大盤屬不二之選。

（TVB　301周一凌晨3時45分直播）
馬沙利擺大個頭搶W

國米雖然排緊聯賽榜第5位，但其實已落後榜首祖雲達斯15分，而AC米蘭仲離譜，少祖記24分，兩隊莫講話爭標，連攞下屆歐聯入場券都好困難。雙方球會高層想睇埋今場傳統大戰，再考慮是否喺歇冬期間搵新帥。特別係國米新班主托希爾有意喺1月增兵換血，估計「清洗名單」包括埋教練馬沙利，如果今場贏唔到死敵AC，恐怕好快冇得留低。
施多夫或替阿里基

事實上馬沙利冇嘢叻，最擅長打進攻足球，球隊16輪聯賽攻入36球，屬各隊之冠，既然嚟到生死關頭，梗係要盡量發揮自己強項，擺大個頭去搶W啦！

AC米蘭教練阿里基帥位亦甚危殆，有消息指會方已同昔日名將施多夫達成協議，準備由佢接手，加上一直支持阿里基嘅高層重臣加利安尼失勢，由太子女芭芭拉掌權。阿里基冇得再懶懶閒，依家凡事都要靠自己，只有勝出今場「打吡戰」，先至有籌碼同芭芭拉討價還價。

其實AC近況已有好轉，起碼卡卡大勇，大大提升中場進攻組織力，巴洛迪利一向自視甚高，踢大戰特別落力，無非想攞威，到時又可以話自己拍得住美斯、C朗等球星，耀武揚威一番。國米防線好曳，近3仗失咗9球，啱晒卡卡同巴洛迪利搵食。由於兩隊都想贏波，進攻意欲強，呢場開大機會高。