班主急功領隊變代罪羔羊

猪拉多纳

外國體壇有句名言，就係A coach is hired to be fired（教練係請嚟被炒嘅），呢句話可以講係非常貼切。英超早前有兩位主帥先後被辭退，分別係西布朗嘅奇勒同熱刺嘅保亞斯，Peter對保亞斯被炒冇咩意見，不過就唔太同意奇勒咁快就「玩完」。Peter知道熱刺主席利維先生做嘢比較「辣」，手起刀落送走保亞斯絕對唔出奇；反而西布朗去年喺奇勒領軍下以「蔗渣價錢踢出燒鵝味道」，只係球隊早前錄得四連敗就將奇勒「落鑊」，顯得有啲殘忍同不近人情。
費Sir頭六年都冇料到

現時嘅球隊老闆都比較急功近利，教練往往就成為代罪羔羊。記得費爵爺喺曼聯嘅頭六年都交唔到成績，但仍然可以留隊直到創造王朝，換轉喺現今球壇就真係好難會出現。不過，曼聯同車路士近期成績都唔算好，但兩軍主帥莫耶斯同莫連奴點解可以仍然冇事呢？自莫耶斯成為曼聯主帥後，球隊並冇大灑金錢買人，只收購咗舊部費蘭尼。前曼聯門將舒米高同Peter講過，初嚟報到嘅主帥買番一兩個舊部其實好正常。至於莫連奴接手嘅車路士，陣中防守中場位置只有咁多年都冇進步嘅約翰米基爾同退步唔少嘅艾辛，大膽講句其實呢家車路士並唔係「寸王」心目中嘅班底。離轉會市場重開仲有十幾日，Peter相信兩位莫帥都會大灑金錢重整軍容。
金句：教練係請嚟被炒嘅