皇馬2.3倍「讓客」捉蝙蝠

猪拉多纳

今晚西甲華倫西亞迎戰皇家馬德里，「蝙蝠兵團」今季戰績倒退，爭逐歐聯席位機會渺茫，日前請埋主帥杜傑食無情雞，暫由B隊教頭艾斯迪維斯接手，家陣內部立立亂，點會有好成績？張峰睇好「銀河艦隊」能夠反客為主，踩多呢隻「蝙蝠」一腳，2.3倍「讓球客勝」咪錯過！

（now632台周一凌晨4:00直播）
華倫後防唔掂16戰失26球

華倫今季放走隊長蘇爾達杜，換嚟老牌前鋒普斯迪加，可惜後者無復當年勇，至今16場聯賽入得3球咁大把，雖然另一前線主將莊拿斯干卡維斯交足貨，弊在始終提升唔到戰績，唔計尋晚啲西甲僅得6勝2和8負排第9。況且佢哋今季失唔少大意波，後衞耐唔耐就夢遊球場，搞到16場失咗26球，今晚面對皇馬強勁鋒線，唔似頂得住。

皇馬上輪作客奧沙辛拿，早早落後兩球兼有沙治奧拉莫斯2黃1紅被逐，最終驚險逼和對手搶番1分，現時被巴塞同馬體會拋離5分，嚟緊要急起直追真係1分都不能少。無疑賽前傳出明夏約滿嘅沙比阿朗素，由於家庭理由決定唔續約，防線又有比比停賽同華拉尼養傷，聽落唔少不利消息，好在拉莫斯成功打甩上場第1張黃牌，換言之今場能夠扼守中路外，艾斯高同莫迪歷呢對創造型中場狀態又夠弗，縱然加里夫巴利報稱有傷未必落場，但前線齋靠C朗同賓施馬都已經夠做啦！