車仔踩油撞冧兵工廠

猪拉多纳

倫敦打吡！寸王專玩雲格！

莫帥「聖誕反擊」！英超聖誕、新年快車開動，車路士會先後硬撼榜首雙雄阿仙奴同利物浦，踢得好隨時可以坐一哥位，搶到爭標主動權。今晚「車仔」會喺「倫敦打吡」造訪阿仙奴，要知道佢哋近年征戰酋長球場贏多輸少，加上「寸王」對住「廠長」雲格更從未輸過，家陣阿仙奴讓波，梗係捧1.62倍「讓客」啦！（now621台周二凌晨4:00直播）
9戰雲格莫帥未輸過

利物浦前晚喺主場砌低卡迪夫城以36分跳上榜首，曼城作客同樣鍊贏富咸，以35分兼較佳得失球壓過阿仙奴上次席，今晚第3位嘅「兵工廠」同第4位嘅車路士對撼，無論勝負都肯定會令聯賽榜再執位。冇錯，「車仔」今季喺英超雖然表現反覆，但就好在踢得麻麻都冇畀人拋甩，今晚一旦贏波隨時可以上番前兩位，你話佢哋點會唔搏？

賽前「寸王」向傳媒話，佢過往9戰雲格得5勝4和都係歷史，對今場勝負冇意思喎。聽落謙虛，但正所謂兵不厭詐，呢啲明謙實寸嘅說話，始終對球員心理優勢有唔少幫助。仲有一點，原來「車仔」歷來9次作客酋長球場係錄得5勝2和2負，呢個球場似佢哋主場多過係「兵工廠」囉！
阿仙奴2件主力缺陣

人腳方面，「車仔」今場有艾辛停賽，但影響未算嚴重，「反骨A高」去完阿仙奴聖誕P後被雪藏，亦都冇乜大不了，「寸王」今仗會改用艾斯派古達踢左閘，但係泰利同伊雲洛域齊齊復任正選，依然畀到人信心。前線無論用伊度奧定費托都好，鋒力一樣靠得住，皆因日前「寸王」已暗示一月會買前鋒，唔想冇得撈，佢兩位大佬梗係要搏命爭取入波啦！

對面嘅阿仙奴連續3仗贏唔出，狀態下滑冇得抵賴，上周仲要慘敗畀曼城3:6，球員信心難免受影響。更大鑊嘅係，防線主力哥斯尼今仗膝傷缺陣，中場大腦韋舒亞又因為對曼城球迷豎中指被罰停賽2場，影響埋進攻組織力，就算有普多斯基傷愈候命，都未必惡得出樣。今晚仲學人讓波？唔輸都偷笑啦！
Data King：車仔踢英超最少入2粒

‧莫連奴9次帶車路士迎戰阿仙奴，取得5勝4和佳績。

‧車路士連續6場聯賽至少入2球或以上。

‧阿仙奴連續10場聯賽主場先開紀錄。

直播以電視台公布為準　

澳職‧西悉尼流浪者 Vs 中岸水手

周一下午4:00‧有線64及203

英超‧阿仙奴 Vs 車路士

周二凌晨4:00‧now621