曼城紅軍力谷半場大

猪拉多纳

拆禮物日信耶蘇有運行

英超快車全面開打，拆禮物日先由億萬大軍曼城主場大戰榜首利物浦。講攻力，兩支球隊火力都極其「恐怖」，曼城雖有阿古路倦勤，但中場有耶耶托尼串連起其他頂級前鋒，火力依然勁猛；而紅軍蘇亞雷斯近期嘅神級演出更加唔使多講。再比近況，兩軍都係連場報捷，咁多因素加埋，今場應係鬥攻格，但入球大得嗰1.46倍，相比之下2.1倍嘅半場大更抵玩。

（now 621周五凌晨1時30分直播）
主場恐怖入球率

啱啱做咗聖誕一哥嘅利物浦櫈都未坐暖就要接受曼城嘅挑戰，擁有金鑽陣容嘅曼城一向火力強大，但今季「智利工程師」比歷連尼手執教鞭後，更將球隊攻力發揮到極致，近9仗有8場係入3球或以上，主場出戰攻力就更加恐怖，曼城迄今為止喺英超總共入咗51球，但有35球係喺主場攻入，強如阿仙奴都要失6粒，今場為咗喺榜首位置踢紅軍落嚟，雖然射手阿古路因傷缺陣，但其他鋒如尼格度、大衞施華同迪斯高等都質素超班，最重要係中場有超級「司令塔」耶耶托尼領軍，進攻瓣數多，估計佢哋一開波即嚟料搶攻，務求早早搶到入波，摧毀敵軍士氣。

雖然利物浦陣容單薄，星味遠不及曼城，但係紅軍嘅攻力亦唔係人咁品，皆因隊中有位一個頂幾個嘅神級前鋒蘇亞雷斯，「蘇神」今季弗爆兼創造埋歷史，成為英超史上首位喺單月內入10球嘅球星，威過C朗、亨利同雲尼斯達萊，近6場都有失波嘅曼城後防又點可以守得住佢先？
一人帶起成隊波

蘇亞雷斯唔單止一個頂幾個，更係一個帶起成隊波，成條中場線畀佢嘅托弗狀態激活咗，佐敦軒達臣、史達寧呢兩位成日畀利迷怒插嘅球員喺阿蘇帶動下成功踢出信心，爆人、助攻、入波瓣瓣有，幫紅軍取得4連勝升榜首之餘，更係場場入3球以上，當中代表作就梗係大炒熱刺5粒，今場對住同樣狀態托弗、同樣大炒熱刺嘅曼城，雙方定必大演入球騷，半場開大似乎冇走雞。
領隊Chit Chat

比歷連尼（曼城領隊）：紅軍唔係只得蘇亞雷斯一個，佢哋依家狀態大勇，而且愈打愈順，我哋要做好準備，呢場肯定係硬仗！

羅渣士（利物浦領隊）：曼城擁有超強陣容，而且資源充裕，絕對係奪標大熱。不過我哋會保持冷靜，專心踢番自己應有水準。