車仔借細捉天鵝

猪拉多纳

嚟緊撼紅軍 隨時玩留力

英超聖誕新年快車賽程頻密，想攞到佳績，最緊要識留放。車路士領隊莫連奴一向機關算盡，幾時衝、幾時Hea，早已有晒計劃。由於車仔剛喺周二凌晨惡鬥完阿仙奴，下仗又要硬撼利物浦，所以今晚主場對史雲斯，正係要留一留嘅時候，預料「寸王」會留有一手，但求小勝攞3分就收貨。史雲斯鍾意控球在腳，但進攻效率低，難以威脅車仔大門，主W1.28倍冇肉食，不如博2.25倍入球細。

（now 622周四晚11時直播）

車路士快車賽程唔易啃，踢完倫敦打吡唔夠3日，就要鬥史雲斯，周日晚更加要迎戰榜首利物浦。對紅軍一役絕對不容有失，莫連奴今場好大機會使用輪換，甚至會拖慢比賽節奏，但求保留體力。查實車仔仲有一大死穴，就係鋒線入球能力極低，三位前鋒費蘭度托利斯、伊度奧同丹巴巴亞今季聯賽加埋只係入得5球，認真失禮。球隊往往靠夏薩特、奧斯卡杜斯山度士、林柏特等中場後上攻門，比較迂迴，威脅力難免打折扣。
史雲斯有姿勢冇實際

「天鵝」史雲斯領隊米高盧特立一心倣效巴塞式控球在腳踢法，但礙於球員質素有限，達唔到預期效果，淨係一味搓波，真正組織到嘅攻勢並唔多，甚至對住下游球隊如韋斯咸、卡迪夫城等都入唔到波。史雲斯去到史丹福橋球場，恐怕佢哋連攞波都有困難，更加唔好話入波。值得一提，兩隊近5次交鋒全部開細，可見無論現時實際情況，抑或歷史數據都顯示今場入波數字唔慌會多。