韋斯咸阿仙奴駁火做大騷

猪拉多纳

前日先惡鬥完車路士嘅阿仙奴，今晚將會作客韋斯咸迎接另一場「倫敦打吡」。兵工廠為咗重上榜首，今仗肯定喪攻冇留手，至於最近鋒力有改善嘅韋斯咸，亦會把握以逸待勞嘅優勢主動出擊，睇怕一場「入球騷」都走唔甩，1.72倍「入球大」夠穩陣！

（now621台周四晚11:00直播）
韋舒亞舉中指 因仔女受辱

阿仙奴中場韋舒亞前仗對曼城嗰陣舉中指，結果要停賽兩場今晚都唔使預佢。尋日佢自爆係因為曼城球迷侮辱佢一對仔女，所以先衰衝動還擊。就算兵工廠冇咗「牛奶仔」，但仲有艾朗藍斯、奧斯爾、禾確特等猛將攻堅，加上前鋒普多斯基已傷愈，火力唔成問題。

不停傳出喺下個月引入新箭頭嘅韋斯咸，最新消息指佢哋將借用曾効力新特蘭嘅射手基恩。陣中一對前鋒卡頓高爾同邁加開始擔心自己位置不保，佢哋對上兩仗各自取得「士哥」，為保前途今晚對兵工廠肯定搏盡。加上擅長後上攻門嘅中場路蘭復出，對住抖得兩日嘅兵工廠，唔係冇一拚之力。