曼聯撚雀至架細

猪拉多纳

快車檔期要識留放

今晚英超曼聯作客「金絲雀」諾域治，由於快車賽程頻密，曼聯一向深明此道，定必識得留放唔會場場去盡，咁啱諾域治剛吃敗仗必求穩陣，隨時搞到紅魔老鼠拉龜，加上近年造訪「金絲雀」少交收，入球細乃不二之選。

（now 621周六晚11時直播）

莫耶斯係一名防守大過天嘅領隊，尤其係接手曼聯後成績麻麻，喺巨大壓力之下，難免喺排陣方面更加保守，為咗追番上前列位置，莫帥只求贏波擸三分，適逢依家聖誕新年快車賽期，踢得咁密體能消耗極大，莫耶斯除咗輪換之外，亦明白要識得留放，因此唔會要班球員場場搏甩髀。
諾域治主場鬥紅魔旺細

雖然曼聯上仗作客反勝侯城，但球隊表現其實麻麻，而且仍有尹佩斯、費蘭尼、拿尼等養緊傷，路爾斯華倫西亞上仗領紅牌要停賽，陣容不整下難望大勝。諾域治上場唔小心輸畀富咸，今場更加會專注防務，但求以穩健風格，加上一班硬淨到暈嘅中場同曼聯周旋。

睇番諾域治近六次主場迎戰曼聯，有五場開細，包括上季擺出血肉長城、爆冷1比0戰勝紅魔嘅經典之役，證明呢招奏效，今仗隨時重施故技死頂曼聯，唔慌多波入，細盤比客勝更值博。