英超榜尾搶水泡埋年

猪拉多纳

韋斯咸遇弱非勝不可

今季英超爭標史無前例咁激烈，其實榜尾一樣咬得緊。隨着新特蘭前晚作客擊敗愛華頓，目前第十三位嘅阿士東維拉至包尾新特蘭只有六分差距，今晚三段直播時間上演多場下游搶分戰，到底邊隊可以趕上「英超搶分列車」，贏波埋年呢？

韋斯咸剛於主場不敵阿仙奴，已經連續5場聯賽未贏過，不過睇番對手全屬硬嘢，輸波情有可原。領隊艾拿戴斯已經落柯打今場對西布朗非勝不可，就算客軍請新領隊開始有眉目，一時三刻都未必可以帶來幫助，韋斯咸讓平半，波童建議捧上盤。

（now 621周六晚8時45分直播）
西布朗立立亂靠唔住

韋斯咸對上五場聯賽輸四場，但對手分別有阿仙奴、曼聯及利物浦，對水晶宮一仗作客無話可說，整體表現唔係想像中咁差。艾拿戴斯喺英超球壇打滾多年，當然深明生存之道，輸呢啲波唔緊要，但係面對同級對手一定搏甩髀，艾拿戴斯喺輸畀阿仙奴後已經講明對西布朗再冇失分空間，球隊今季主場聯賽贏過富咸及卡迪夫城，對新特蘭、維拉亦唔使輸，讓平半可以講係用半個盤博全個盤。

西布朗自炒掉領隊奇勒後，曾經傳過想搵迪馬堤奧、蘇拿等接手，最新消息係前西甲球隊貝迪斯主帥梅爾將會落實簽約18個月，上場作客對熱刺佢亦係座上客，相信好快便會正式公布。球隊對上兩場聯賽雖然有分落袋，但某程度上只係對手突然失準先至有機會追和，西布朗整理表現未見有太大改善，遇上背水一戰嘅錘仔幫唔易應付。