曼聯打「雀」搵到食

猪拉多纳

魔性重現5連勝

「魔」性重現嘅「紅魔鬼」曼聯，前晚「拆禮物日」奇迹反勝侯城，昔日打不死鬥心終於返晒嚟，今晚佢哋挾住5連勝氣勢喺英超聖誕、新年快車第3擊造訪諾域治，憑較強班底輪換出擊，要砌低前線死晒火嘅「金絲雀」又有幾難？曼聯讓半一唔算多，力奇一於撐1.71倍上盤！

（now621台周六晚11:00直播）

曼聯今季換上莫耶斯領軍，開季表現無疑令人失望，不過嚟到季中球隊終於上力，近排連埋歐聯同聯賽盃，就做出5連勝佳績。冇錯，佢哋上仗贏侯城係贏得有運，只係靠對方嘅烏龍波先攞得齊3分，但球隊落後兩球嗰陣踢出嘅氣勢同鬥志，真係有番多少費Sir年代影子o架！

當然，嚟到聖誕快車第3擊，曼聯都遇上一定麻煩，路爾斯華倫西亞停賽，菲爾鍾斯膝傷抖兩周，連拉菲爾達施華都話上陣成疑，好彩係「紅魔鬼」勝在人腳充裕，右閘傷兵多可以搵基斯史摩寧去頂，中堅位仲有兩老尼曼查維迪及里奧費迪南可以候命。
尹佩斯傷愈候命

至於中場線今仗會有卡域克復出擔正，穩定性應該大大提升。前線除咗有射手朗尼同韋碧克，有傳尹佩斯今晚都可能以後備身份落場，如果係真，3分穩執啦！

諾域治呢邊，連續3場聯賽失分已經夠樣衰，上輪對富咸仲要係先勝後敗，對士氣有重大打擊。呢班波今季戰績麻麻最大原因係火力唔掂，18場入16球係英超倒數第5差。最慘係攻不銳之餘，連防守都唔穩，佢哋今仗有後防重心米高端立停賽，對住大勇嘅「紅魔」，凶多吉少！