史篤城穿窿 熱刺做東贏兩粒冇難度

猪拉多纳

易帥後有番啲起色嘅熱刺，今晚續於主場迎戰史篤城。熱刺新帥舒活改用雙箭頭打法，球隊一向攻力不足嘅問題終於有所改善，適逢史篤城中後場傷兵滿營之餘，兩大悍將格連韋倫及馬克威爾遜齊齊坐波監，實力大削，好難頂得住熱刺嘅狂轟猛炸，讓球主勝非常值博。

（now 622周一凌晨零時直播）
舒活重用艾迪巴約

雖然係踢防中出身，但舒活好重視熱刺嘅進攻足球傳統，一上場就將備受前任保亞斯冷落嘅多哥箭頭艾迪巴約解凍，為經常孤軍作戰嘅蘇爾達杜搵個好幫手，之前作客修咸頓，二人就合作炮製咗1個靚士哥，睇嚟幾合拍喎，上仗主場被西布朗逼和一役，舒帥夠膽死排出基斯甸艾歷臣、基菲爾施古臣、查迪尼及賀治比嘅中場線，一個硬淨防中都唔用，睇得出熱刺依家想踢番精彩足球以挽回民心。

撞啱史篤城有門將比高域及賀夫缺陣，中堅梳爾哥斯受傷上陣成疑，上仗作客紐卡素半場未夠，就有防中格連韋倫同後衞馬克威爾遜領紅被逐，今仗要停賽，加上踢少兩個兼大敗收場，體力及士氣均大受打擊，熱刺仲唔趁機打落水狗咩？有埋地利要贏兩粒冇難度喇！