蘇神復仇記 紅軍唔怕撞車

猪拉多纳

喺邊度跌低，就喺邊度企起身！利物浦球星蘇亞雷斯今年4月「鍊車」嗰陣怒咬伊雲洛域，被重罰停賽10場，一度以為佢會就此告別英超，但「哨牙蘇」竟能排除萬難，憑出色表現重新響朵！今晚利物浦喺英超2013壓軸戰造訪車路士，紅軍作客受讓，力奇捧1.74倍「讓客」！

（now621台周一凌晨0:00直播）
車仔近4次主場對賽不勝

「蘇神」上季喺晏菲路對車仔嗰陣搞出滿城風雨，今次雖然作客史丹福橋，但話晒都係佢出事後首次「鍊車」，呢位烏拉圭射手自然成為焦點。即使撇除咬人事件，「哨牙蘇」都一定係今場波嘅主角，事關佢近13場聯賽勁入19球，就連紅軍主帥羅渣士都讚佢停賽復出後愈嚟愈成熟，因「咬」得福，以佢依家嘅實力同狀態，絕對有力搞寸泰利今晚嘅「藍戰士」600戰派對！

再者，咪以為紅軍2日前鬥曼城輸1:2就睇死佢哋唔掂，查實當日利物浦形勢唔輸蝕，若非球證發雞盲，錯判史達寧單刀入波係越位，又或者紅軍下半場把握力好多少少，絕對有力喺曼城腳下搶到分。

車仔爭標形勢唔算曳，但佢哋鋒弱毛病冇改善，對主帥莫連奴帶嚟相當大嘅困擾，今晚無論出邊個打箭頭，睇怕都唔會有太大威脅，單靠中場後上入波，你估講咁易咩？冇錯，車路士今晚都會作部分輪換，林柏特、艾斯派古達同加利卡希爾等都有望擔正，不過中場重心拉美利斯停賽，打擊實在唔細。最重要係原來車仔近4次主場對住利物浦，竟然錄得1和3負，擺明被剋死，仲話讓波出擊，點捧得落手呀！
Data King 蘇神只差1粒平英超紀錄

‧車路士近6次主場鬥利物浦，錄1勝2和3負。

‧利物浦近14場聯賽作客倫敦球會，共入29球。

‧蘇亞雷斯上季2鬥車路士都取得「士哥」，只要佢今晚入1粒，就會成為英超史上第7位喺1年內取得30個聯賽入球嘅球員。